قصيدة بعنوان (حضن أب) للشاعر / محمد أبوزيد

أنا فيكي لسه بترسم ع الوش ضحكة وفي كل سكة بتندهك أنا خطوة فارشة .. ألف عِشرة .. حضن أب أنا روح لقلب .. بينبضك شهقة ونفس أنا طير في روحك وأتحبس جوه غُنًا انا مش أنا انا بعض منك .. بس عاش في جسم تاني انا وقتك المهدود .. ما بين البحر والموج اللي طاش وسط المواني انا عبد عاشق كل طاعة تقربه يسكن في خلد ... المؤمنين ... ويصلي في كعبة عنين وسع الحياة ... انا ألف آه ..إحساس دفين ... راشق ما بين الضلعة ...والشهقة القوية أنا دقة الساعة في يدك .. لما يدك تضبط الإحساس منبه للحنين .. فيدق فيا انا نقطة من ريقك ما بين الشفتين عشقي قناعة وحبي دين روح التفاني في الغرام المستعر وقت الحروب .. الساكنة فيا واسير بيحلم يتأسر .. علي ايد هواكي المستبد وبينهصر في الشوق يدوب .. التلج ميه انا غمزات ... دايبين في خد ونغزتين .. بيشدو روح احساسي شد انا كلمة .. وعيونك قاموس انا قلب مهووس ... بيكي حد ... الاختلاط بين فرحة في كوشة عياط ودموع .. بترقص في أنسباط .. صرعات قوية بين موت وموت وبيوت مشاعر في إنتظار لم الخيوط المنهكة فتعالي طيري فوق بساط الحلم طير وشوفي صبري .. لما عمري يبقي في صوابعك خرير وتعالي لمي من العبير اللي اتبدر لحظة شروقي لما وزعتك علي دمي في عروقي كالزكا أنا طفل نازل فيكي بوس عمال يعد .. اتنين تلاته اربعة وكأني ضحكة موزعة علي شفتين عمال بيحضن في الحنين نازل بكي مانا قوتك .. احساس عزيمتك بعض ايمانك ... بتسليم قلب مؤمن للقدر.. وناموس بيؤمن بالكتاب .. لما اشتكي بطن السحاب فنزل مطر .. جوه العنين .. من رقرقة احساس بريء ... ضي لشموع وبتنصهر علشان تنور لك طريق مفروش بياسمين .. اللوقي انا ضيك الساكن قمر عمره ما غاب .. عن كوكبك انا بشربك ... في كل فنجان بالحليب علي كل ريق شوقي مرض وانتي الطيب المرتجي انتي بشاير روحي .. وزهور مبهجة طلقت اريجها .. في جنتي المفروشة طِيِبْ وبخور تَقْي .. بيتمتمك وقت الصلاة عند المقام ... أنا لهفة الرعشة في تنهيدة السلام أنغام ... علي عود الربيع في الانتشا انا طفلة غاوية الفرفشة فتنام في احضان امها يا عيون مها . ورموش كحد السيف.. بتدبح مهجتي .. حسيتي دمعة القصيدة لما حَسْت إنها ... راح تنتهي وأنا بشتهي ..أفضل أدندن فوق ملامحك ..لحن صوفي .. فتحسي خجل الكلمة لما تكون حروفي مَلَجَمَا دوقي يا أعظم ملهمة ... طعم القصيدة وأخده من نَفَسًكْ حَلَي أبياتي ضحكة مذهلة .. حاولت تقول عنك قليل صابها الفشل يا سلسبيل كل المعاني .. أديني تاني من مداد الانبهار فيضي يا اشعار .. من عسل ابيات غزل.. هاااا كملي .. قلبي خلاص رايح ...يتوه جوه النهار هايقولها تاني وينجلي من بعدها مليون بحبك ... كل ما اكتمها ... بتتطلع وحدها و كأنها ... اعصار مزلزل داخلي .. زي البخار لما عليا بتقفلي ... وتغطي روحي بالبعاد .. فتلاقي بركان المشاعر فاض وزاد فيا انفجر ولا الف شاعر يطلعوا مني عشان .. يقلوكي في قصيدة غزل لكن بتعجز الصور ... عن وصف شي وارجع اجوب بيكي الطريق من اوله انا قلبي باب مفتوح لشوقك مستحيل شيء في الوجود ده يقفله